Դատախազությունը Ռոբերտ Քոչարյանի որդու ընտանիքից պահանջվում է բռնագանձել 14 անշարժ գույք և միլիարդների հասնող պարտատոմսեր
Դատախազությունը ՀՀ 2-րդ նախագահ Ռոբերտ Քոչարյանի որդուց՝ Սեդրակ Քոչարյանից ու նրա կնոջից՝ Զարուհի Բադալյանից, պահանջում է հօգուտ ՀՀ-ի բռնագանձել անշարժ գույքեր, պարտատոմսեր ու այլ ֆինանսական միջոցներ։
Դատախազությունը պահանջում է Քոչարյանից բռնագանձել 14 անշարժ գույք, Երևան քաղաքում 1 բնակարանի գնման իրավունք, ինչպես նաև 11 իրավաբանական անձում մասնակցություն։
ՀՀ դատախազությունը հայտնում է՝ Ռոբերտ Քոչարյանի որդու ընտանիքից պահանջվում է բռնագանձել նաև 1,361,852 դոլարով և 985,190,729 դրամով ձեռք բերված պարտատոմսեր, 703.059 և 200.000.000 դրամի չափով ներդրված ավանդ, 8 մլրդ 235,4 մլն դրամի, 4, 007, 674 դոլարի, 588. 954 և 16.000.000 չափով տրամադրված փոխառության պահանջի իրավունք։
«Հունաստանի Միկոնոս կղզու Անո Մերա կոչվող տարածքում գտնվող առանձնատան ձեռքբերման (կառուցման) արժեք՝ 1.286.635.500 դրամ, տանզանական «Փլեյմաստեր գեյմինգ քորփորեյշն» ընկերության մասնակցության ձեռքբերման արժեք՝ 416.084.506 դրամ, տանզանական «ՄՄՋ Գոլդ Լիմիթեդ» ընկերության մասնակցության ձեռքբերման արժեք՝ 1.958.657.659 դրամ»,-նշված է դատախազության հաղորդագրությունում։
Որպես ապօրինի ծագում ունեցող դրամական միջոցների մնացորդ նրանցից կբռնագանձվի 2 մլրդ 721.3 մլն դրամ, իսկ որպես անձի օրինական եկամուտներով չհիմնավորվող, ապօրինի ծագում ունեցող և բարեխիղճ ձեռքբերողների փոխանցված կամ չնույնականացված դրամական միջոցների հանրագումար՝ 11 մլրդ 270.4 մլն դրամ։
