Երեկ մահացած Շիրակ» ՖԱ ակադեմիայի սան 16-ամյա Նարեկ Գրիգորյանը օրեր առաջ ֆուտբոլ խաղալիս ընկել էր, գլխով գետնին հարվածել ու ուսի կոտրվածք ստացել
Երեկ գիշեր Երևանի հիվանդանոցներից մեկում մահացել է 16 ամյա Նարեկ Գրիգորյանը: Նա Գյումրիի «Շիրակ» ֆուտբոլային ակումբի ակադեմիայի սան էր:
Այսօր «Շիրակ» ֆուտբոլային ակումբը Նարեկի մահվան մասին մասին լուրը հայտնել է և ցավակցություններ հղել ընտանիքին։
REGIONS TV-ին հասած տեղեկություններով, Նարեկը օրեր առաջ ֆուտբոլ խաղալիս վայր է ընկել, գլխով գետնին հարվածել ու ուսի կոտրվածք ստացել: Դեպքից մի քանի ժամ անց նրա ինքնազգացողությունը վատացել է, տեղափոխվել է «Գյումրի» բժշկական կենտրոն: Տղայի ծանոթների պատմելով, հիվանդանոցում ուսի վիրահատություն են սկսել, որից հետո բժիշկները տեսել են, որ նրա գլխին էլ վնասվածք կա: Փորձել են գլխի վիրահատական միջամտություն անել, բայց տեսնելով, որ բարդ խնդիր է, կապ են հաստատել Երևանի վիրաբույժների հետ ու տղային սանավիացիայով տեղափոխել Երևան, որտեղ 3 օր գիտակցության չգալով, Նարեկ Գրիգորյանը մահացել է:
Նրա ընտանիքը բնակվում էր Գյումրիում: Նարեկը Հայաստանի պետական տնտեսագիտական համալսարանի Գյումրու հենակետային վարժարանի սան էր: Ընտանիքի 3 երեխաներից միակ որդին: Նրա հոգեհանգիստը տեղի է ունենալու Ամասիա գյուղի եկեղեցում:
Կարինե Կազարովա
