Վրաստանում խուզարկել են ընդդիմադիրների և ակտիվիստների գրասենյակներում ու բնակարաններում. ընդդիմության առաջնորդներից մեկին ծեծի են ենթարկել և կալանավորել․Jam-news
Վրաստանում ոստիկանությունը մի շարք խուզարկություններ է կատարել ընդդիմադիր գործիչների, ակտիվիստների գրասենյակներում և բնակարաններում՝ Թբիլիսիում և այլ քաղաքներում հազարավոր բողոքի ցույցերի պայմաններում, որով ընդդիմադիրներն ու նրանց աջակիցները պահանջում են երկիրը վերադարձնել եվրաինտեգրման ուղուն:
Այս մասին գրում է Jam-news-ը:
Լրատվամիջոցի փոխանցմամբ՝ երկրի վարչապետ Իրակլի Կոբախիձեն ընդդիմության առաջնորդներին կրկին անվանել է «լիբերալ ֆաշիստներ» և զգուշացրել, որ նրանք պատասխանատվության կենթարկվեն, իբրև թե բողոքի ցույցերը կազմակերպելու համար։
«Արմատական ընդդիմության առաջնորդները և «հարուստ հասարակական կազմակերպությունները» թաքնված են իրենց գրասենյակներում, սակայն նրանք են պատասխանատու վերջին օրերին Ռուսթավելի պողոտայում տեղի ունեցած բռնությունների և անկարգությունների համար», – ասել է վարչապետը։
Խուզարկությունները տեղի են ունեցել «Ազգային շարժում» կուսակցության երիտասարդական թևի, ինչպես նաև «Հանուն փոփոխությունների» կոալիցիայի» և նրա անդամ կուսակցությունների գրասենյակներում։ Խուզարկել են նաև ակտիվիստ Իլո Գլոնթիի տանը, որը Ֆեյսբուքում ավելի քան 200,000 հետևորդ ունեցող Daitove խմբի ադմինիստրատորն է, և աջակցում է բողոքի ցույցերին: Նա հայտնել է, որ առգրավվել են իր համակարգիչն ու հեռախոսը։
Հաղորդվում է, որ Գլոնթին մեղադրվում է բռնություն հրահրելու և անկարգություններ կազմակերպելու մեջ։
Ըստ լրատվամիջոցի՝ ընդդիմադիր «Ախալի» կուսակցության առաջնորդ Նիկա Գվարամիային դաժան ծեծի են ենթարկել և կալանավորել։ Դա տեղի է ունեցել «Դրոա» կուսակցության գրասենյակի մոտ, որտեղ խուզարկությունն էր։ Հայտնի չէ, թե ուր է տեղափոխվել Գվարամիան։ Ձերբակալվել է նաև կուսակցության անդամ Գելա Խասայան։
Վրաստանում բողոքի ցույցերը մեծ թափ ստացան այն բանից հետո, երբ երկրի վարչապետը հայատարարեց, որ Վրաստանը հրաժարվում է ԵՄ-ին անդամակցելու բանակցություններից մինչև 2028 թվականի տարեվերջ։
Հոկտեմբերին կայացած խորհրդարանական ընտրություններում հաղթել է իշխող «Վրացական երազանքը», ընդդիմությունը չի ճանաչել ընտրությունների արդյունքները, ուստի նրանք իրենց աջակիցների հետ բողոքի ցույցերի միջոցով պահանջում են նոր ընտրություններ։ Եվրախորհրդարանը կոչ է արել նոր ընտրութուններ անցկացնել։
ԱՄՆ –ն հայտարարել է, որ դադարեցնում է ռազմավարական գործընկերությունը Վրաստանի հետ։
