Շիրակի մարզպետի մի խորհրդականը Գյումրու ավագանու մանդատը վայր դրեց, մյուս խորհրդականը նույն ավագանիում մանդատ ստացավ

ՔՊ-ն շարունակում է վերադասավորումները Գյումրու լուծարված ավագանիում՝ նորից մանդատներ են վայր դնում ու նոր մանդատներ ստանում

Այսօր հայտնի դարձավ, որ Գյումրու ավագանու անդամներից  մեկը՝ ՔՊ-ական Լիլիթ Մուրադյանը վայր է դրել մանդատը։ Նրան փոխարինել  է մեկ այլ ՔՊ-ական՝ Վանիկ Մարտիրոսյանը։

Գյումրու ավագանին պաշտոնապես լուծարված է, բայց մինչև առաջիկա ՏԻՄ ընտրությունները, այսինքն նոր ավագանու ձևավորումը, համարվում է գործող, կարող է նիստեր գումարել ու որոշումներ ընդունել, եթե իհարկե, քաղաքապետի ժամանակավոր պաշտոնակատարը նիստեր գումարելու նախաձեռնություն ցուցաբերի ու քվորում ապահովվի։  Իսկ Սարիկ Մինասյանը  լրագրողների հետ հարցազրույցում մի քանի անգամ հայտնել է, որ մտադիր չէ ավագանու նիստեր հրավիրել։

Նիստեր չեն հրավիրվում, բայց ավագանու անդամների ակտիվ փոփոխություններ են տեղի ունենում։ Անցած տարեվերջին ավագանու 2 անդամներ՝ Արթուր Պապիկյանն ու Նարեկ Բեկզադյանը մանդատները վայր դրեցին, իսկ հիմա՝ ևս մեկը։

Գյումրու ավագանու մանդատը վայր է դրել  Լիլիթ Նորիկի Մուրադյանը։ Այս մասին հունվարի 15-ի արձանագրությամբ հաստատել  է Գյումրու թիվ 31 ընտրատարածքային ընտրական հանձնաժողովը։ Լիազորությունները վաղաժամկետ դադարած ավագանու անդամի մանդատը տրվել  է «Քաղաքացիական պայմանագիր» կուսակցության ընտրական ցուցակի հերթական հաջորդ թեկնածու Վանիկ Կոլյայի Մարտիրոսյանին։

Լիլիթ Մուրադյանն աշխատել է «Ռադիոհայ Գյումրի» ռադիոկայանում և «Ցայգ» հեռուստաընկերությունում որպես հաղորդավար, մեկնաբան, ծրագրերի բաժնի ղեկավար, եղել է «Սթայլ մեդիա» ՍՊԸ գործադիր տնօրեն։ Գյումրի համայնքի ավագանու անդամ է եղել 2021 թվականից,։

REGIONS TV-ին Լիլիթ Մուրադյանը հայտնեց, որ ավագանիում իր գործունեության 3 տարիների ընթացքում օրենսդրական առանձին նախաձեռնությամբ հանդես չի եկել, բայց մի շարք համատեղ նախաձեռնությունների հեղինակ է։ Ավագանիում նա աչքի էր ընկնում իշխող «Բալասանյան Դաշինք» կուսակցությանն ուղղված քննադատական ելույթներով։

Նա մեզ հետ զրույցում նշեց նաև, որ ավագանու մանդատը վայր է դնում այլ աշխատանքի անցնելու կապակցությամբ, բայց չմանրամասնեց, թե ինչ աշխատանքի։ Նա 2022-ին նշանակվել է  Շիրակի մարզպետի խորհրդական, ու դեռ շարունակում է զբաղեցնել այդ պաշտոնը։

Նոր մանդատ ստացած Վանիկ Մարտիրոսյանը նույնպես Շիրակի մարզպետի խորհրդականն է։ Նա 1 ամիս էլ չկա, ինչ զբաղեցնում է այս պաշտոնը։ Մինչ այդ աշխատել է բանկերից մեկի անվտանգուևթյան ծառայությունում, անհատ ձեռնարկատեր է, 2021-2023 թվականներին եղել է մարզպետի օգնական, իսկ 2023-2024 թվականներին զբաղեցրել է ԱԺ պատգամավոր Դավիթ Առուշանյանի օգնականի պաշտոնը։ Այժմ էլ մարզպետ Դավիթ Առուշանյանի խորհրդականն է։

Հիշեցնենք, որ «Բալասանյան Դաշինք» սոցիալական կուսակցության ավագանու 14 անդամների մանդատները վայր դնելուց հետո, Գյումրու ավագանին 19 անդամ ունի ու իրավազոր է շարունակել գործունեությունը, քանի որ քվորում ապահովելու համար անհրաժեշտ 17 մանդատը կա։

Կարինե Կազարովա