«Դա արվել է Ադրբեջանի նախագահի հայտարարությունն արդարացնելու համար»․ԱԺ նախագահն՝ ադրբեջանական ապատեղեկատվության մասին
«Չէ, կարծում եմ, որ չհաջողության մասին պնդում անելու համար հիմք չկա։ Կարծում եմ՝ դա արվել է Ադրբեջանի նախագահի հայտարարությունն արդարացնելու համար, որն ասում էր, որ հայկական կողմի նկատմամբ զրոյին մոտ վստահություն կա, ինչը ինքնին իմ համար զարմանալի է, որովհետև մեր աշխատանքը և գործելաոճը, նույն այդ պայմանագրի համաձայնեցված լինելու հայտարարության տրամաբանությունը խոսում է հակառակի մասին»,-այսօր խորհրդարանում լրոգրողների հետ ճեպազրույցում ասաց ԱԺ նախագահ Ալեն Սիմոնյանը՝ պատասխանելով հարցին՝ արդյոք ադրբեջանական կողմի տարածած ապատեղեկատվությունը, իբր թե հայկական զինված ուժերը մարտի 16-ին կրակել են սահմանի հարավարևելյան ուղղությամբ տեղակայված դիրքերի ուղղությամբ, չի վկայում խաղաղության գործընթացի ձախողման մասին։
Նա հիշեցրեց, որ ՀՀ ՊՆ-ն արդեն երեք անգամ հերքել է ադրբեջանական կողմի պնդումները, ԵՄ դիտորդական առաքելությունն էլ հայտարարել է, որ սահմանին որևէ կրակոց չի արձանագրվել։
«Ենթադրում եմ, որ այս ամենն արվում է՝ Ալիևի «զրոյական վստահության» մասին հայտարարությունը ներպետական լսարանին ներկայացնելու համար»,-հավելեց ԱԺ նախագահը։
Հիշեցնենք, Ադրբեջանի նախագահ Իլհամ Ալիևը օրերս հայտարարել էր, թե «Հայաստանի ղեկավարության նկատմամբ վստահության մակարդակը զրոյին մոտ է, և խաղաղության համաձայնագիրը ստորագրելու համար Հայաստանը պետք է իր Սահմանադրությունից հանի Ադրբեջանի նկատմամբ տարածքային պահանջների դրույթները»։
Անդրադառնալով Խաղաղության պայմանագիր կնքելու համար Ադրբեջանի առաջ քաշած պահանջներին՝ փոխել ՀՀ Սահմանադրությունն ու լուծարել ԵԱՀԿ Մինկսի խումբը, Սիմոնյանն ասաց՝ կարող ենք փորձաքննության ուղարկենք երկու երկրների սահմանադրությունները՝ պարզելու, թե արդյոք այդ պնդումները իրականության հետ աղերս ունեն, թե ոչ:
«Միշտ կարելի է ասել, օրինակ, ինձ դուր չի գալիս քո մազերի գույնը, կամ դուր չի գալիս քո ձեռագիրը կամ որևիցե բան, բայց պետք է ամեն ինչի տակ հիմնավորում լինի։ Մինչ այս պահը Ադրբեջանի հետ բանակցությունների մեջ մենք փորձել ենք ամեն ինչի տակ հիմնավորում ունենալ և այդ այդ տրամաբանությամբ ենք իրենց հետ աշխատել։ Կարծում եմ, որ շարունակությունն էլ էլի տրամաբանված և հիմնավորված կլինի: Օրինակ, կարող ենք ուղարկել Վենետիկի հանձնաժողով մեր երկու երկրների սահմանադրությունները և հարց ուղարկել, թող Վենետիկի հանձնաժողովը պայմանական ասի՝ նման բան կա, թե ոչ»,-ասաց Ալեն Սիմոնյանը։
