«Զբոսաշրջությամբ զբաղվող բազմաթիվ սուբյեկտներ ցածրորակ ծառայություններ են մատուցում, ցածրորակ զբոսավարներով, հայկական մշակութային ժառանգությունը ներկայացնում իրենց պատկերացումներով»
Կառավարությունը զբոսշրջային ընկերությունների համար նոր կանոններ ու պահանջներ է սահմանում
Կաավարությունը նոր կանոններ է սահմանում զբոսաշրջության ոլորտի համար։ Այսօր կաավարության նիստում ընդունված որոշմամբ սահմանվում է զբոսաշրջային օպերատորի կողմից զբոսաշրջային ծառայությունների մատուցման, զբոսաշրջային գործակալի կողմից զբոսաշրջային ծառայությունների մատուցման պահանջները, զբոսաշրջային գործունեության սուբյեկտների կողմից զբոսաշրջային ծառայությունների մատուցման կանոնները։
Այս մասին տեղեկացնում են կառավարությունից»
Որոշմամբ առաջարկվում է սահմանել զբոսաշրջային գործունեության սուբյեկտների կողմից զբոսաշրջային ծառայությունների մատուցման կանոնները և պահանջները, որոնք նպատակ ունեն ոչ միայն հստակ տարբերակելու զբոսաշրջային օպերատորների և զբոսաշրջային գործակալների գործունեությունը, այլև ապահովելու որակյալ ծառայությունների, հավասար մրցակցային դաշտի առկայությունը զբոսաշրջության ոլորտում։
Զբոսաշրջության ոլորտի նոր օրենսդրությամբ նախատեսված է 2024 թվականի սեպտեմբերի 1-ից զբոսաշրջային ծառայություններ մատուցող անձանց գործունեությունը դարձնել ծանուցման ենթակա։ Օրենսդրական վերոգրյալ փոփոխությունը կնպաստի Հայաստանում զբոսաշրջային կազմակերպության կողմից պարտավորությունները չկատարելու դեպքում օրենքով հաստատված սպառողների շահերի պաշտպանությանը, Հայաստանի և հայկական զբոսաշրջային արդյունքի վերաբերյալ ճշգրիտ տեղեկատվության տրամադրման վերահսկողության մեխանիզմների ներդրմանը։
Չնայած նրան, որ Օրենքով ներկայացված են զբոսաշրջային գործունեության սուբյեկտների հիմնական հատկանիշները, այնուամենայնիվ, դրանցից յուրաքանչյուրի համար անհրաժեշտ է սահմանել պահանջներ ու կանոններ, որոնք պարտադիր կլինեն և կապահովեն թե՛ ծառայությունների բարձր որակը, թե՛ հավասար մրցակցային դաշտի առկայությունը՝ նպաստելով ոլորտի կարգավորմանը։
«Հատկանշական է, որ ներկայումս զբոսաշրջության ոլորտում առկա է մի իրավիճակ, որը բացասական է ազդում մրցակցային միջավայրի վրա։ Բազմաթիվ սուբյեկտներ, մեծամասամբ նույնիսկ առանց պետական գրանցման, զբաղվում են զբոսաշրջային օպերատորի կամ զբոսաշրջային գործակալի գործունեությամբ, մատուցում ցածրորակ ծառայություններ՝ ներգրավելով նաև ցածրորակ զբոսավարներ, Հայաստանն ու հայկական մշակութային ժառանգությունը ներկայացնում են իրենց կարողությունների ու պատկերացումների շրջանակներում, որպես կանոն, աշխատակիցներ չունեն և աշխատատեղեր չեն էլ ստեղծում, հարկեր չեն վճարում, բնականաբար ծառայություններն առաջարկում են անհամեմատ ավելի ցածր գներով, քան բարեխիղճ գործարարները, որոնք արդեն կանգնած են շուկայից դուրս մղման վտանգի առաջ»,-հայտնում են կառավարությունից։
Որոշման ընդունումը, ըստ գործադիրի, կնպաստի զբոսաշրջային օպերատորի և զբոսաշրջային գործակալի պատշաճ գործունեության, հավասար մրցակցային դաշտի, ծառայությունների բարձր որակի ապահովմանը։
Փոխվարչապետ Մհեր Գրիգորյանն ընդգծել է, որ հավաստագրման ինստիտուտը նպաստավոր է նաև տնտեսվարողի համար, որովհետև հավաստագրում ունենալով՝ ավտոմատ շնորհվում է նաև որոշակի իմաստով վարկանիշ: Փոխվարչապետի խոսքով՝ կարևոր է, որպեսզի մարդիկ հասկանան, որ եթե տնտեսվարողը հավաստագրված է, ապա ռիսկերը զսպված են:
«Ես կարծում եմ, որ ոչ թե կարգավորման հավելյալ վարչարարության ծախսեր ենք գեներացնում, այլ նաև բիզնես հնարավորություն ենք տալիս ոլորտին, բայց դրա դիմաց նաև պիտի վարկանիշի համակարգով անդրադարձ ունենա այն վիրտուալ կայքերին, որոնք բովանդակություն չունեն, որպեսզի մարդիկ ավելի զգուշավոր լինեն»,-նշել է Մհեր Գրիգորյանը:
