«Դեռևս հայտարարագրի շեմը վերջնական սահմանված չէ, բայց սահմանված են տույժերը։ Աշխատող մարդու վրա լրացուցիչ բեռ են դնում»․ դժգոհություններ համընդհանուր հայտարարագրման համակարգից

Հայաստանի արհմիությունների կոնֆեդերացիայի նախագահը նկատում է՝ բազմաթիվ քաղաքացիներ չեն կարողանում օգտվել կայքերից, ինչպե՞ս են լրացնելու հայտարարգիրը, արդեն գովազդներ են շրջանառվում, 15000 դրամի դիմաց առաջարկում են հայտարարագրել քո եկամուտները

«Մարդը պետք է ունենա էլեկտրոնային ստորագրություն, ինչի համար պետք է վճարի 3000 դրամ, պիտի բջջային հեռախոսի մեջ համակարգն ակտիվացնելու համար քարտը փոխի, որն արժի մոտավորապես 500 դրամ»,այս մասին այսօր «Մեդիա կենտրոն»-ում կայացած «Ի՞նչ խնդիրներ է իրականում լուծում համընդհանուր եկամտի հայտարարագիրը» թեմայով քննարկման ժամանակ ասաց Հայաստանի արհմիությունների կոնֆեդերացիայի նախագահ Էլեն Մանասերյանը։

Այս տարի մինչև մայիսի 1-ը ավելի քան 700,000 մարդ պետք է ներկայացնի հայտարարագիր՝ մանրամասնելով վերջին մեկ տարվա ընթացքում իրենց հաշիվներին մուտքագրված գումարի չափը։

Քննարկման ժամանակ Ֆինանսների նախարարության Եկամուտների քաղաքականության և վարչարարության մեթոդաբանության վարչության պետ Օրի Ալավերդյանը, մեկնաբանելով համակարգի նպատակները, նշեց. «Պետությունն ուզում է հասկանալ, թե Հայաստանի քաղաքացիներն ինչպիսի եկամուտային պորտֆել ունեն: Հայտարարագրման համակարգի մասնակից են այն քաղաքացիները, որոնք համարվում են ՀՀ ռեզիդենտ, որոնք տարվա մեծ մասը բնակվում են Հայաստանիում, որոնք հետագայում հասցեատեր են լինելու պետական աջակցության ծրագրերին»։

Էլեն Մանասերյան

Էլեն Մանասերյանի կարծիքով՝ այն, ինչ նախատեսված էր որպես թափանցիկ և արդար համակարգ, սռաջացրեց տարակուսանք ու դժգոհություն:

Նա վստահեցրեց, որ բազմաթիվ ահազանգեր են ստանում քաղաքացիներից՝ դժգոհելով, որ այս ամենի նպատակը հետագայում քաղաքացիներին տուգանելն է․«Պատճառն այն է, որ քաղաքացիներին չէին պատրաստել այս ամենին: Ուստի նորմալ ու արդարացի է քաղաքացիների բողոքը, որովհետեւ դաշտը դատարկ էր, լցված ապատեղեկատվությամբ: Իրազեկվածության բացն է բերում ցայտնոտին: Սա նաեւ ցավոտ բեռ է աշխատող մարդու համար՝ հաշվի առնելով այն հանգամանքը, որ մենք ունենք բազմաթիվ աշխատող աղքատներ»:

Մանասերյանի խոսքով՝ կան բազմաթիվ քաղաքացիներ, որոնք պարզապես չեն տիրապետում այդ բազային գիտելիքներին, չեն կարողանում օգտվել կայքերից։ Նա վստահեցրեց, որ արդեն գովազդներ կան հաշվապահական ծառայությունների, որոնք 15000 դրամի դիմաց առաջարկում են հայտարարագրել քո եկամուտները:

Նրա կարծիքով՝ այսպիսով աշխատող մարդու վրա լրացուցիչ բեռ է դրվում։

Փայլակ Թադևոսյան

«Հարկ վճարողների պաշտպանություն» ՀԿ նախագահ Փայլակ Թադևոսյանը էլ նշեց, որ երկու տարի առաջ, երբ այս համակարգը ներկայացվում էր, ասվել էր, որ միջազգային  այտարարագրի հետ ոչ մի կապ չունի․ «Դրսում հայտարարագրման համակարգը շեմ ունի, ոչ բոլոր անձիք են հայտարարագիր ներկայացնում, և եկամուտների շեմ կա, որից ցածր եկամուտ ստացողները պարզապես հայտարարագիր չեն ներկայացնում»։

Տաթև Ղազաևյանը, որը ևս մասնակցում էր քննարկմանը, այն քաղաքացիներից է, որն արդեն լրացրել է հայտարարագիրը ու նաև փորձում է օգնել մյուսներին լրացնել այն։ Նա նշեց, որ թեպետ հորդորում են սպասել մինչև մարտի 1-ը, որ որոշակի փոփոխություններն ավարտվեն, այնուամենայնիվ, շատ հարցեր ու խնդիրներ են արդեն առաջանում․ «Առաջին հայացքից թվում է, թե սա շատ լավ բան է, բխում է քաղաքացիների շահերից, պետությունը ցանկանում է մեր ֆինանսական շարժը հասկանալ, աջակցել, բայց ցանակացած օրենք, որն ընդունվում է, պետք է բխի քաղաքացու շահից ու բարոյականությունից։ Դեռևս շեմերը վերջնական սահմանված չեն, բայց սահմանված են տույժերը՝ ինչ կլինի, եթե չներկայացնեն հայտարարագիրը»։

Լուսանկարները՝ Մեդիա կենտրոնի

Սյուզաննա Խառատյան